Ita fai, aundi andai?

Is urtimas novas o si bolleus nimancus novas meda no funti, po su pertocat su trabballu est ainantis de is ogus nostrus. De Portu Turre a Porto Vesme est una passara de CIG, de su primu’e su mesi de Arxolas a sa Rock Wol de Bidha’e Cresia nci nd’ant essi atrus duxentus, su movimentu operaiu sardu est perdendi corpus! Ma un’atra cosa chi ancora de prus no arrenisciu a cumprendi est ca giovunus medas s’accunortant de andai a traballai, fadendi oras medas e dinai pagu, mudus, no si depint e podint chesciai cun is sindacaus o atru, dhus su reggollint a cuntratedhus de aminculu, cun su famini de trabballu chi nc’est, po fintzas’e s’albanesu pariri unu benefattori, anchi dhu caliri ……! Custu personagiu, ex sindaclista in s’Euroallumina, iat po fintzas fatu bonus integrativus poi is trabballadoris de cuss’asienda, perou su meri iat cumprendiu aundi cust sindalista bolliara arribbai, a contus fatus dh’ant donau centu cincuanta milionis e sa gestioni de s’Euralcoop. Apustis custu militanti de su PCd’I (marxista-leninista), sa rivolutzioni dh’at fata ponendi in peis nantis sa Conad, apustis Leclerc. Aundi est chi custu personagiu at pecau? Est diventau unu capitalista peus de is atrus, unu meri ancora peus, poita sfrutara e ricatara is trabballadoris, ca depint po fintzas’e votai PD, poita est istetiu po fintzas’e cun Soru. Arratza’e genti mala! Bandara a favori de is capitalistas e no de is trabballadoris, chi dhu bieis andendi in giru cun sa Mercedes, bellu'e berus pariri! In sardu no isciu cali dicciu dhi ‘onai si cussu de su priogu allucidau o cuss’atru chi narara tristu de su pobiru avantzau! Nimancu in tempus de is democristianus nci fiat custu ricatu aicci mannu, ca mancai no fessist de cussa parrochia agatasta de traballai chentza de essi iscrau de custa genti. Is cinesus che is cinesus, su personali chi pigant a trabballai de inoi, dhi faint fai is ott’oras, paga a tariffa sindacali, ferias e permissus, in s’imperu francu-italiota, ti castianta cantu nci ponis po andai a fai is abbisongius o si ti firmas a pappai unu mussiu’e pani, seus torrendi cent’annus a coa, seus perdendi diritus, dinai, saludi, dinidadi! A bortas a intendi po fintzas’e trabballadoris chi tenint annus trabballaus, narendi: custus funt privaus…Dhus arrispundu ca mancai siant privaus funt tentus a rispetai is cuntratus de trabballu e is leis, pariri ca portant sa conca sboira, casi tuvura che cussa de sa reiga. Deu nau ca nosus indipendentistas podeus fai meda, torrendindi a scirai sa cussentzia de is trabballadoris sardus. Saludus indipendentistas.